اسعار وجبات الافطار فى شهر رمضان 2010 بالنادى (عزومات الاعضاء)

اسعار وجبات الافطار فى شهر رمضان بالنادى (عزومات الاعضاء) والله تعتبر ببلاش

شوفو الاسعار وتخيل انك هتعمل عزومه فى البيت تكلفك كام وفى النادى بكام

دا غير ان العزومه هتكون فى الهوا الطلق وعلى ضفاف النيل
وكله هيكون جاهز يعنى لا تحضير ولا بهدله
وانتم فاهمين بهدله العزومه بتكون شكلها ايه قبلها وبعدها

اسعار جنان
اقلها
لو عزمت مثلا عشرة افراد يكلفك 150 جنيه يا بلاش
ولا تطبخ ولا تغسل ولا اى حاجه
يعنى تروح انت ومعازيمك زى الباشا
ولو عايز تزود عن 150 جنيه انت وشطارتك بقا

تعالو نشوف الاسعار



اضغط على تكبير الصورة لرؤيتها بوضوح


وشكرا لمدير الكافتيريا
الاستاذ/محمد عبد البر

وكل عام وانتم بخير

والله يا بلاش دا الواحد يروح يعزم عائلته 10 افردا 15 ولا حاجة

والله يا بلاش
بس هو فيه دلفري
وشكرا

عايزة كمان دلفرى ههههههههههههههههههههههه
ما نجبلك حد كمان يكلك بالمرة بدل ما تتعبى نفسك وتكلى انتى
ههههههههههههههههههههههههههههههه

حلوة العزومة على البحر وتوفير فى الفلوس كمان

اوك شكرا علي المعلومه واحجز ازاي

اهلا كابتن محمد
الحجز امرة بسيط
تتصل بالتليفون بالاستاذ محمد وتتفق معاه
بس احنا عايزين نعرف رايك فى لسته الاسعار دى والوجبات دى
احنا عارفين انك شيف كبير فى مطعم سياحى
ورايك يهمنا

مع تحياتى

شكرا استاذ احمد لردك
ومن الواضح ان السؤال عن الدلفري دلوقتي بيضحك
واظن ان دا مطعم يعني اكيد فيه توصيل للمنازل
يعني مافيهاش حاجة تضحك خالص

شكرا علي الموضوع

بس يا استاذ احمد الاسعار مبالغ فيهابطريقة غير عادية بمعني ان وجية سحور بالشكل ديه سبعة جنيهات ديه يعتبر الضعف علي هذه الوجبة لو انت نزلت عند البغل هتلاقي اسعار افضل من كده بكتير
او بلاش البغل مطاعم جاد بطنطا او المنصورة او اسكندرية شوف الاسعار فيها عاملة ازي او مطعم الجعان بططا اللي هو الان اكبر مطعم في الغربية اسعار ممتازة وخدمة ممتازة وخدمة اربعة وعشرين ساعة وخدمة التوصيل كمان
وكمان اسعار الحلويات الطبق بسعبة جنيه ليه هي الصينية بكام اصلا من عند الصياد و الصعيدي 14 ،15 وانت طالع
وسعر البسوسة غالي جدا ليه هو عند الصاد والصعيدي الكليو بكام علي فكرة هذه الاسعار مبالغ فيه جدا والمفروض النادي يقدم خدمة للاعضاء ميش يمص دم العضاء
هذا رايي الشخصي في الموضوع مع احترامي الكامل لادارة النادي و الكافتير
شكرا

والله عندك حق يابلسم
المطاعم دي خدمه 24 ساعه
وفوق دا كله فيه دلفري
بس بلاش كلمة دلفري احسن
الكلمه دي دلوقتي اصبحت نكته
كل اللي يشوفها يضحك عليها
وانا من رأي ان الواحد يعمل عزومه من عند اي مطعم من دول
مش هاتكون التكلفه زي كدة هاتكون اقل بكتير
وكمان الحلويات هاتكون من عند الصعيدي او الصياد او السنيطي اقل بكتير برده

والله احنا عايزين خدمة في النادي بس ميش اسعار مبالغ فيه ديه المفروض النادي يدعم هذه الواجيات للاعضاء اللي هي مصدر دخل النادي حتي لو مرة واحدة في السنة علشان لم يطلب من العضاء تاي مبالغ تدفع العضاء لانه بيقدم خدمات ميش بتدفع وميش خدمات
شكرا

يا سادة هيه وجهات نظر
ودى اقل اسعار فى نظام النوادى
انما تقولى فول من عند البغل
وكوكتيل من عند السامولى
ومطعم فى طنطا

اصلا مفيش مقارنه
ولما تقارن تقارن بين اسعار نادى ونادى
مش نادى ومطعم

وبالنسبه لدعم النادى
اصلا بوفيه النادى والمطعم
مش بتوع النادى ولا ادارة النادى
علشان يعمل دعم

دا بيكون واحد واخد المطعم والبوفيه بايجار
والنادى يحدد له اسعار حاجات معينه والمعروفه
زى الشاى والقهوة والنسكافيه والسحلب والحاجات الساقعه مثلا يعنى
اما الحاجات اللى مش متحددة فى العقد
من حق مدير المطعم والبوفيه ان يحط السعر اللى يعجبه واللى يكسبه
يعنى الموضوع ليس له علاقه بادارة النادى
ومن المؤكد ان استاذ محمد مدير البوفيه والمطعم حاطت سعر اقل من سعر نادى البلديه على الاقل
والمفروض يكون اعلى لان قاعدة نادى الصيد تختلف تماما عن القاعدة فى البلديه
هتقولو القاعدة دى بفلوسنا
صح طبعا بفلوسنا
بس هوة لازم يستغل الفرصه ولو بشكل جزئى

وياخت رونا
انا مش بضحك تريقه
انا قصدى ان دا مطعم نادى مش مطعم عام
يعنى مطعم قاصر على نادى الصيد
واعضاء نادى الصيد
يعنى مينفعش واحد مش عضو يعمل عزومه فيه اصلا
وبالتالى ميكنش فيه نظام الدلفرى

مع تحياتى

اوكي ولا اكن حاجة حصلت

بس مطعم كان زمان مطعم نادي وفيه توصيل للمنازل
ودا مطعم نادي مش مطعم عام
والمفروض يكون دا اللاعضاء وغير الاعضاء
ومش للاعضاء بس ودا يكون علشان الشهر الكريم
شهر رمضان
ومع تحياتي

مطعم كان زمان مش مطعم النادى اصلا دا مطعم عام
ولو واحد مش عضو عايز ياكل منه
ياكل بس بشرط انه يقعد داخل قاعه فرجينيا مش يقعد فى حديقه فرجينيا
لان الحديقه خاصه باعضاء النادى بس
وانتى قولتى اهه اسمه كان زمان مش مطعم نادى الصيد
زى ما قاعه فرجينيا مش قاعه افراح نادى الصيد
يعنى القاعه والمطعم مش قاصرين على اعضاء النادى بس
لكن اعضاء النادى لهم امتيازات خاصه

على فكرة تعتبر اسعار معقولة جدا علشان لو راح مثلا واحد عزم عائلته على مطعم من بره هيكون اسعاره اكثر من اسعار النادى بس مش بكتير حوالى 5 جنيه

صح منونا بس خمسه جنيه على كل شخص
وما ننسى فرق المكان اللى له تمن مش محسوب

انا النهاردة رحت انا والمدام واولادى نفطر فى النادى
ومش عارف اقولكم ايه واوصف ازاى الروعه اللى شوفنها
اولا الخدمه فوق الوصف
المكان روعه ويحمل كل المعانى من هدوء ورومانسيه وراحة بال
الاكل كان روعه وكتير لدرجة ان تقريبا نصه رجع من كثرته

رحنا والمغرب بيأذن ظروفى جت كدة
دخلنا نصلى فى جامع النادى
طلعنا لقينا الطربيزة جاهزة وكل شئ متغلف بورق فضى
حتى الشوك والمعالق والسكاكيين متغلفين بورق هاندى
وكل حاجة سخنه
وشكل الاكل وهو متغلف يفتح النفس وطبعا احنا صايمين
وفى زجاجتين واحدة عرقسوس وواحدة سوبيا وزجاجه مياه معدنيه كبيرة
قعندا شربنا الاول
وبعدين فكينا التغليف عن الاكل
كل واحد طبق فيه كميه رز معقوله وربع فرخة كبير
وطبق بسله بالبطاطس كبير وبابا غنوج وسلطات وطحينه ومخلل بكميات مشبعه
وعيش لكل فرد رغفين والرغيف كبير
وكل شويه يجيلك مدير المطعم يسئلك اى خدمه
يعنى ناقص يحطلك الاكل فى بوقك

وكان فى اكثر من عزومه فى النادى يعنى فى طلب ما شاء الله على المطعم

كلنا وشبعنا ورحنا نغسل ادينا ورحنا على كورنيش النادى وقعدنا فى الهوا
والتعب اللى بيجى للواحد بعد الفطار دا كلنا عارفينه
والله ما حسينا بيه
طلبنا قهوة وشربنها فى جو من الضحك والتهريج والعيال راحت تلعب لغايه الساعه 12
والحساب 45 جنيه
تلات طلبات
طلب ليه وطلب للمدام
وطلب لطفلين صغيرين
ونص الاكل رجع لكثرته

يا بلاش

وشكرا جزيلا للاستاذ محمد عبد البر مدير المطعم والكافتيريا

دي اسعار بسيطة اووووي

كويس جدا بس نوعيت الاكل اية

اظهر

حاجة جميله جدا
هل سيستمر العرض والخدمة لمابعد رمضان

يا ترى العرض دة لسة مستمر بعد رمضان

مششششششكور